Cərrahiyyə həyat verir!!!!!!!

Bu günlərdə M.Topçubaşov adına Elmi Cərrahlıq Mərkəzində Prof. Dr.Med Qurban Müslümovun rəhbərlik etdiyi cərrahlar briqadası tərəfindən çox unikal bir xəstə üzərində əməliyyat aparılıb. Uzun müddətdir çox şiddətli qarın ağrılarından şikayət edən xəstəyə pankreasın şişi olduğu və bunun da çarəsi olmadığı qərarı verilsə də xəstənin vəziyyətinin çox ağır olduğunu nəzərə alaraq xəstəyə cərrahi əməliyyat aparılmışdır. Əməliyyat zamanı çox nadir hallarda rast gəlinən bir patologiya-yuxarı mezenterik arteriyanın şaxəsi olan aşağı pankreatikoduodenal arteriyanın psevdoanevrizması aşkar edilmişdir. Apardığımız araşdırmalara görə bu patologiya ilk dəfə 2009-cu ildə ədəbiyyatda təsvir edilmiş və bu günə qədər ədəbiyyatda 6 belə hal rast gəlinmişdir. Bu xəstələrdə anevrizmanın partlama təhlükəsi çox yüksək olur ki, bu zaman da fatal nəticə demək olar ki, qaçılmazdır. Xəstədə Dr. İlyas Həsənovun rəhbərlik etdiyi komanda tərəfindən uğurla anevrizmanın angioqrafiyadan sonra radioloji embolizasiyası aparılmış və bununla da xəstənin həyatına olan təhlükə tam aradan qaldırılmışdır. Bununla da ölüm hökmü verilmiş bir xəstəyə yeni həyat bəxş edilmişdir. 

Bu münasibətlə xəstənin müalicəsində əməyi olan hər kəsə dərin təşəkkür edirik! Cərrahiyyə həyat verir!!!!!!!